दैदिप्यवान रंगवर्धन सोहळा !

दिवस - १

उद्घाटन सोहळा

चार दिवसांचा भव्य दिव्य दिमाखदार सोहळ्याची सुरुवात करणारा कार्यक्रम म्हणजे उद्घाटन सोहळा ! दीप्रज्वलनाने सुरुवात होऊन, पालखी घेऊन स्वतः प्रमुख पाहुणे जाताना, भजनाच्या सुमधुर आवाजात, ढाेल ताशांच्या गजरात, मर्दानी खेळांच्या चित्तथरारक दृश्यात डोळ्यांचे पारणे फेडणारा असा एक अद्भुत सोहळा !

नृत्याविष्कार

नटरंग देवताचे स्मरण करून दरवर्षी VJTI तसेच मुंबई मधील विविध महाविद्यालयातील स्पर्धक आपली नृत्य कला सिद्ध करण्यासाठी ‘नृत्याविष्कार’ या रंगवर्धन आयोजित कार्यक्रमात सहभागी होतात. सर्व प्रकारच्या संगीतांवर, नृत्य पद्धती पाहून आपले डोळे दिपवण्याची संधी प्रेक्षक कधीही सोडत नाहीत !

दिवस - २

एकपात्री

एकपात्री म्हणजे एकट्याने करायचा अभिनय ! अनेक विषयांवर आधारित एकपात्री प्रयोग VJTI तसेच इतर महाविद्यालयांतील विद्यार्थी सादर करतात. नवरसांच्या छटा स्पर्धक पडद्यावर सादर करायला कुठेही कमी पडत नाही. परिक्षकांना निकालासाठी गोंधळात टाकणारे एकापेक्षा एक सादरीकरणं प्रेक्षकांना मात्र भुलवता !

टॉक शो

मराठी विश्वातील वेगवेगळ्या प्रमुख हस्तिंसोबत मनमुराद गप्पा करण्याची एक अनोखी संधी म्हणजे अर्थातच टॉक शो. आपल्या समोर बसून मोठ्या दिग्गजांशी बोलण्याची, त्यांच्या प्रवासाबद्दल जाणण्याची, त्या क्षेत्रातील असणाऱ्या संधींबद्दल मार्गदर्शन घेण्याची संधी हा कार्यक्रम आपल्याला दरवर्षी उपलब्ध करून देत असतो.

दिवस - ३

पथनाट्य

'मराठी रंग जगाचा, मराठी रंग मनाचा ' कलाकारांच्या कलागुणांना प्रोत्साहन देऊन त्यांना त्यांची कला दाखवण्यासाठी उपलब्ध केलेला आणखी एक मंच म्हणजे पथनाट्य ! वेगवेगळ्या महाविद्यालयातील विद्यार्थी येऊन आपले पथनाट्य येथे सादर करतात. अनेक वास्तववादी विषय तसेच चालू घडामोडींच्या विषयांनी परिपूर्ण असेलेली ही पथनाट्ये दरवर्षी जनजागृतीच्या कामात महत्त्वाची भूमिका बजावतात.

ग्रेट भेट

मराठी क्षेत्रातील दिग्गज मंडळी या कार्यक्रमाअंतर्गत रंगवर्धनला भेट देऊन आपल्याबद्दल जाणून घेतात आणि त्यालाच आपण ‘ग्रेट भेट’ म्हणतो. रंगवर्धन-wall, रंगवर्धन आयोजित कार्यक्रम, उपक्रम यांची माहिती घेऊन नंतर प्रमुख पाहुणे योग्य ते अभिप्रायपर मार्गदर्शन रंगवर्धनला करत असतात. यानंतरच्या त्यांच्या प्रवासाच्या गप्पा गोष्टी जाणून घ्यायचा मोह प्रेक्षक विद्यार्थी वर्गाला आजवर आवरला नाही

मराठी संगीत मैफिल

आपली आवडती मराठी गाणी आणि आपले आवडते गायक हे आपल्या समोर येऊन खास आपल्यासाठी LIVE गायन प्रस्तुत करतात आणि यालाच आपण म्हणतो LIVE IN CONCERT ! दरवर्षी मराठी गायक/गायिका स्वतः आपल्या समोर येऊन मराठी संगीताची शिदोरी उघडतात. नेहमी मोबाईल/TV मध्ये पाहत असलेलो गाणी जेव्हा प्रत्यक्षात गायक स्वतः आपल्यासमोर गातात, ते दृश्य जेवढं डोळ्यात भरून ठेवावं तेवढं कमीच !

दिवस - ४

कवडसा

रंगवर्धनचा आत्मा म्हणजे कवडसा. रंगभूमी हे नटांचे सर्वस्व असते आणि याचसाठी आयोजित केली जाते ‘कवडसा’ स्पर्धा ! मुंबई तसेच महाराष्ट्रातील नामांकित महाविद्यालयातील नाट्य संघ आपल्याकडे येतात आणि हजारोंची बक्षिसे मराठी सिनेसृष्टीतील दिग्गज अभिनेते, अभिनेत्री दिग्दर्शकांच्या उपस्थितीत वाटली जातात.

गाणेतराने

गायक आणि संगीतकारच्या मधुर आवाजाला उत्तम प्रतिसाद देणारा रंगमंच म्हणजे गाणेतराने ! आपल्या तसेच बाकीच्या इतर महाविद्यालयातील विद्यार्थी इथे येऊन आपली संगीतातील कारकिर्द दाखवतात आणि तपासून पाहतात. शास्त्रीय संगीतासह पारंपारिक संगीतांनी युक्त अशी स्पर्धकांची जुगलबंदी प्रेक्षणीय ठरते.